Ander Ka Zaher Choom Liya Dhul K Aagaye
Jitne Sharif Log Thay Sab Khul K Aagaye.
Suraj Se Jung Jeetne Nikle Thay Bewakoof
Saare Sipahi Mom K Thay Sab Ghul K Aagaye.
Masjid Me Door Door Tak Koi Doosra Na Tha
Hum Aaj Apne Aap Se Mil Jhul K Aagaye.
Neendon Se Jung Hoti Rahegi Tamam Umar
Ankho Me Band Khawab Agar Khul K Aagaye.
Suraj Ne Apni Shakal Bhi Dekhi Thi Paheli Baar
Aine Ko Maze Bhi Taqabul K Aagaye.
Anjane Saye Phirne Lage Hain Idher Udher
Mausam Hamare Shaher Me Kabul K Aagaye.
No comments:
Post a Comment